Нарăс уйăхĕн 21-мĕшĕ – пĕтĕм тĕнчери тăван чĕлхесен кунĕ. Ачашăн тăван чĕлхе питĕ пĕлтерĕшлĕ. Вăл мĕн пĕчĕкрен тăван чĕлхе пулăшнипе пĕлÿ пухать,  аталанать. Ахальтен мар чăвашсен аслă вĕрентекенĕ, Иван Яковлевич Яковлев, тăван чĕлхесĕр чăн-чăн пĕлÿ çук тет.

   Юманай вăтам шкулĕнче аслă классем хушшинче тавлашу урок пулчĕ. Пурне те пĕр ыйту кăсăклантарчĕ: « Тăван чăваш чĕлхи кирлĕ-и пире?»

     Ачасен тĕрлĕ шухăш пулчĕ. Кирлĕ мар текенсем те тупăнчĕç.  Анчах çак шухăш нумайăшне килĕшмерĕ.

     Петров Дима (11класс) шухăшĕпе, ачана ашшĕ-амăшĕ вырăсла калаçтарса ÿстерет, ача   пĕлÿ илет, çитĕнет, аслă шкулта та вĕренет . Анчах хăш халăх çынни пулать? Юнĕ чăваш, характерĕ чăваш, тăванĕсем чăваш.  Чĕлхипе кăна вырăс. Кам вăл?

   « Ачана  чăваш ашшĕ-амăшĕ вырăсла вĕрентсе мĕн параяççĕ-ши? Сăпка юрри мĕнле чĕлхепе юрлать-ши амăшĕ? Кушай, нельзя сăмахсемсĕр пуçне мĕн илсе  çитĕнет ача? Ашшĕ-амăшĕн чунри сисĕм-туйăмĕсене курса ăнланакан пулĕ-ши?», - çак ыйтусене пачĕç вуннăмĕшсем.

    Вольтер каланă: «3-4 çул хушшинче Европăри чĕлхесене вĕренме пулать, анчах тăван чĕлхене ĕмĕрĕпех вĕренмелле». Эпир вара калаçма та вĕренесшĕн мар.